nn árlegi Ljósadagur var haldinn á Laugarvatni 29. nóvember síðastliðinn með jólamarkaði, vöfflukaffi, tendrun jólaljósa, kertafleytingu, hlaupandi börnum og hlæjandi fullorðnum. Þennan dag koma margir uppaldir en brottfluttir Laugdælingar heim í dalinn til að skófla í sig vöfflum með fjölskyldu og gömlum vinum.

Þáttaka Lions í deginum er nokkur og á ýmsum sviðum. Á jólamarkaðnum bjóðum við upp á ókeypis blóðsykurmælingu. Mælingunni hefur verið mjög vel tekið og margir sem nýta tækifærið og láta mæla sig. Hörður Bergsteinsson sá um mælinguna í ár og tók um leið blóðþrýstingsmælingu á þeim sem vildu. Blóðsykurinn reyndist almennt góður en nálægt efri mörkum hjá nokkrum. Ein kona mældist mjög ofarlega og var henni ráðlagt að láta athuga það betur.

Seinni partinn sér klúbburinn svo um tendrun jólaljósa á grenitré í Bjarnalundi. Þar hélt Smári Stefánsson smá lestur yfir fjöldanum og í framhaldi söng yngsta kynslóðin jólalög fyrir fjöldan. Eftir Bjarnalund er haldið niður að vatni þar sem flotkertunum sem klúbburinn selur á jólamarkaðnum er komið á flot undir ljúfri tónlist frá DJ Sævari Ást. Það brennur stundum við að veðurguðinn svíki okkur þegar fleytingin fer fram en í ár var veðrið eins og best getur á kosið með sléttu vatni og passlegri golu til að kertin flutu í fallegri halarófu frá bakkanum og út á vatnið. Eftir fleytinguna býður Fontana svo í kaffi og heitt kakó. Svo skemmtilega vill til að innsti koppur í búri hjá Fontana er félagi í Lkl. Laugardals, Sigurður Rafn Hilmarsson, svo líklegt þykir að bæði kaffið og kakóið hafi verið framúrskarandi hvað gæði varðar eins og honum einum er lagið.

…er á morgun á Laugarvatni! Það verður ekki leiðinlegt, það verður gaman!

Kertin verða til sölu að vanda á jólamarkaðnum í grunnskóllanum og við vatnið.
Það þykir meira að segja líklegt að þau verði seld í Bjarnalundi líka… það er magnað!!

Ritari

Eins og boðað var fyrir fyrsta fund þetta starfsárið þá gátu þeir sem vildu fengið að láni hross og mætt ríðandi á fudnarstað. Fjórir fórum við ríðandi kóngsveginn frá Hólum að Efstadal og fengum stórskemmtilega staðar-, örnefna- og sögukynningu frá formanni okkar Jóhanni Gunnari.

Fundurinn fór fram að mestu með hefðbundnu sniði en eftir að honum var slitið bauð Sölvi Arnarson, verti í Efstadal, félagsmönnum upp á Lions tilboð á hamborgurum og öl með. Menn týndust svo í burt einn og einn þegar leið á kvöldið en síðustu félagsmenn yfirgáfu veitingahúsið einhverntíma eftir miðnættið. Það er óhætt að segja að Hótelið í Efstadal er góður staður heim að sækja. -> www.efstidalur.is

Skötuveislan gekk feiknar vel þetta árið sem fyrri ár og tóku 80 manns á öllum aldri hraustlega til matar síns. Yfirkokksi dagsins var Sigurður Rafn en honum innan handar stóð formaðurinn sjálfur, Sölvi Arnarsson. Aðrir félagsmenn skiptu svo með sér að þjóna í sal og sápa leirtaugið en það er eftir traustum heimildum haft að aldrei hafi leirtau verið jafn fast og jafn vel skrúbbað og þegar Jói Gunni og Pálmi Páls spókuðu sig við vaskinn.

Laugarvatn á við þann kvimleiða vanda að stríða að hafa ekkert félagsheimili á staðnum. Sökum þess þurfa félagasamtök á svæðinu ávalt að leita á náðir fyrirtækja og/eða stofnana á ef halda á uppákomur innanhús. Sem betur fer höfum við hér flottan hóp vel samfélagsþenkjandi einstaklingar, fyrirtækja og stofnana og þarf því sjaldan að hringja nema eitt símtal áður en húsnæði er fundið og vill Lionsklúbburinn þakka Menntaskólanum að Laugarvatni fyrir að hafa enn og aftur þjónustað samfélagið af miklum sóma með afnotum af húsnæði skólans.

Hér fyrir neðan má sjá nokkrar af mörgum myndum sem teknar voru í veislunni.

Það viðraði mjög vel á mannskapinn í Bjarnalundi í gærkvöldi þegar Jólaljósin voru tendruð af lions mönnum í viðurvist fjölda fólks. Eftir að Sölvi Arnarsson, formaður Lkl. Laugardals hafði boðið fólk velkomið hélt skólameistari Menntaskólans að Laugarvatni, Halldór Páll Halldórsson stutta ræðu og kór miðdalskirkju tók lagið.

Að þessu loknu var arkað niður að vatni og kertum fleytt í gríð og erg. Oft er það svo að veðurguðinn reynist kertafleytinum erfiður og kertin þá ekki náð frá bakka og jafnvel sokkið í öldugangi en þetta árið var kallinn í háloftunum kláralega í góða skapinu því við vatnið var lognið nánast algjört, mjög mildur vindur blés kertunum vel út á vatnið austanvert og var því sjónarspilið mikið þegar á leið.

Fontana boð svo gestum og gangandi í kaffi/kakó og smákökur og var því mjög vel tekið af börnum sem og fullorðnum.

Kertafleyting Lions gekk sem sagt vonum framar og telur sá sem þetta skrifar skrifar að þar hafi góður tónn verið settur fyrir jólahátíðina í ár.